Gikan sa Sambanwá Bicol Missalette, 11 Octubre 2020 An mga evangelio winoptico nakacentro sa programa ni Jesus na ibalangibog an Kahadean nin Dios (Basileia tou Theou). An evangelio ni San Mateo nakacentro sa pagdara nin Marhay na Bareta sa magkahalong comunidad nin mga Hudiyo asin Griyego o mga Gentil na nagtubod ki Cristo asin naging mga Cristiano. Dai nawawara an tensyon sa duwang grupo kaya an parabola ipinanunungod sainda. Enot, an Dios minahanda nin bangkete o fiesta para sa gabos. Sa enot na Babasahon hale ki Profeta Isaias, nilaladawan an Dios na galante sa pagpakakan nin masisiram na kakanon asin pagpa-inom nin mga managom na mga arak. Pinapamate niya an abundancia sa paagi nin bangkete. Pinapara niya an mga luha sa mga mata kan mga tawo sa bilog na kinaban. Ini an kaligtasan para sa gabos (universal salvation). Sa icaduang Babasahon gikan sa Surat ni San Pablo sa mga taga Filipos, pinapa-abot man ni San Pablo na tood siya sa kadaihan asin abundancia, sa igwa asin sa mayo, sa kagutoman asin pagkabasog. Para saiya, God provides. An Dios an nagtatao kan gabos na biyaya asin bendisyon hale sa saiyang pagkaherak asin pagkamatinao. Sabi ngani sa Salmo 23, "an Kagurangnan sakong Pastor, dai nin anuman na magkukulang sa sako." Sa Evangelio gikan ki San Mateo 22:1-14, sa liwat ipinapaabot sato an ladawan nin Dios nin abundancia na naghahanda nin engrandeng banquete (Royal banquet), bako sanang engrandeng kakanan (Lk 14:15-24). An bangkete Royal, sa Griyego “ariston” bako sanang sarong aldaw o sarong karakanan, kundi nagkakapirang mga aldaw. Arog kita kaiyan ka padangat nin Dios, “siksik, liglig, at umaapaw.” A royal banquet with a twist. An mga enot na imbitado o mga huespe de honor nagharabo, nagsarayuma, bako lang yan, nangurolog, nang harass, nang insulto asin naggaradan pa kan mga surogoon kaya labi an kaanggotan kan hade kaya pinadara kaini an mga kawal asin hukbo, winasak asin pinadusahan an mga paragadan asin sinulo an saindang ciudad. An scenario na ini minapagiromdom sato kan nangyaring pag sakop asin pagwasak kan Templo sa Jerusalem kan Romanong General na si Tito kan taon 70 A.D. Hinihiling kan mga Cristiano na ini sarong kapadusahan sa mga Israelita na nagsayuma sa imbitasyon na akoon ang evangelio na dara ni JesuCristo, an pagsayuma sa Kahadean nin langit na dara kan Mesias na si Jesus. An icaduang imbitasyon pinanunungod sa mga nasa laylayan o mga nasa kalsada (sa Griyegong tataramon diexodos). Pinaimbitaran kan hade an gabos na mga nasa kalsada, marhay man o maraot, mayong diskrimimasyon. Gabos na yaon sa mga kalsada kabale na an mga nasa iskinita, gabos na mga etchapuera. Ini an imbitasyon para sa mga pagano, mga Griyego, mga Gentil, para sa gabos, para sa satuya. Iyo ini an twist, huli ta nagsayuma an piniling banwaan na Israel, nabenepisyohan kitang mga nasa laylayan, o mga nasa diexodos, mga kalsada (asin mga iskinita). Bako sana so mga maray asin mga banal, kundi si mga masombikal asin mga parakasala. Arog kita kaini ka padangat nin Mahal na Dios. Panghuri, pag inapod kita nin Mahal na Dios sa saiyang engrandeng bangkete, igwa kita nin responsibilidad o katongdan na mag sul-ot kan gubing na akma sa pang kasal, idtong angay asin formal na bado, simbolo kan satong pagiging katood (hetaire) kan kinasal. Dai kita puedeng maging Gate crashers ta kun dai, papahaleon kita sa bangkete, itatapok kita sa luwas kun saen yaon an pagtangis asin pagragot kan mga ngipon. Papadusahan kita nin makuri kaya an mga imbitado, bako lang imbitado, kundi kaipuhan magkakanigo asin makapasa sa paghatol kan Dios. Ini an leccion kan parabola. Makukua sa pinakahuring verso, v. 14: “kadakul an mga inapod, alagad kaka dikit an mga napili... Many are called but few are chosen.” — Rev. Fr. Philip Francis R. Bersabe Cura Parroco, Paroquia nin Nuestra Señora de Katipanan Nabua, Camarines Sur I-download an Sambanwá para sa Domingong ini. Click here!

Gikan sa Sambanwá Bicol Missalette, 4 Octubre 2020 Minsan nagtaram si San Agustin “God is always trying to give good things to us, but our hands are too full to receive them.” An Dios nagtatao sato nin mga maray na bagay, alagad pano an satong kamot sa pag ako kaiyan. Sa Evangelio ngonian, nahiling niato an na an may sadiri kan ubasan, iwinalat niya ini sa saiyang mga tumatawo. Tanganing sa itinalaan na panahon, igwa siyang maguno sa saindang ani. Enot niatong mahihiling na an satong Dios na marahayon. Ihiniheras niya an saiyang sadiring (Ubasan) tanganing ini magin mabunga. Ipinapasabot sato na kita tinawan nin pagkakataon na makisumaro sa pagpatalubo kan saiyang mga nilalang. Kita inaapod na katiwala o stewards. Nin huli kaini bako lang palan siyang marahayon kundi siya Dios na nagtitiwala sa satuya. May tiwala siya sato na satong aatamanon an saiyang ubasan. Kaogmahan niya na pinapayaman ta an saiyang ubasan. Panduwa, an Dios niato Dios na pano nin pagpasensya. Naghahalat siya nin tamang panahon nin pag ani. Isinusugo niya saiyang mga enot mga profeta, sagkod na ipadara niya an saiyang aki. Sa paghuna na gagalangan siya ninda. Alagad sya saindang ginadan. Linalang nin Dios an gabos nganing magheras - an saldang, an bulan, an bitoon, an dagat pati an tinanom asin lalong lalo na an tawo– gabos ini may katuyuhan na magtao. Alagad huli sa kasalan, an tawo nagin ma-isip asin makasadiri. Kun kaya pati an bako saiya, saiyang kinukua. Tama an sabi ni San Agustin: An Dios nagtatao sato nin mga maray na bagay, alagad pano an satong kamot sa pag ako kaiyan. Dai ta man siguro ginagadan an ipinadara niyang Aki, alagad nin huli sa kasibutan niato sa pagpabunga kan satong mga rogaring, naiisip ta na siya storbo sa pagpayaman niato. Kaya dakul nagsasabi, busy ako, mayo akong oras sa pagsimba. Pantolo, tandaan niato sa paglaog niato sa kasunduan, igwang kitang paninimbagan o accountability. Nin huli ta satong Dios, matanos (Just). Dai siya matugot na an saiyang ubasan mapasakamot nin mga makuri asin mayong pakinabang na surugoon. Kaipuhan niato an marahay na hatol tanganing magin tama an satong mga gigibohon. Sabi ni San Pablo sa ikaduwang babasahon, “panoa an saindong isip kan gabos na totoo, gabos na maninigong kamawotan, asin galangan gabos na marahayon asin maninigong omawon. Asin magdadanay saindo an katoningonan”. Kaogmahan nin Mahal na Dios na an saiyang ubasan magin mabunga tanganing mag-ani siya nin dakul para sa saiyang kahadean. Sa katapos-taposi an mga tumatawo sa saiyang ubasan iyo na an aanihon – bako nang ubas. Tandaan ta an kasabihan na ini: Remember that the happiest people are not those getting more, but those giving more. Mas maogma an tawo na nagtatao sa Kagurangnan. — Rev. Fr. Luisito A. Occiano Direktor, Caceres Commission on Communications Cura Parroco, Parroquia nin San Bartolome Apostol, Baao, Camarines Sur I-download an Sambanwá para sa Domingong ini. Click here!

Gikan sa Sambanwá Bicol Missalette, 27 September 2020 Corruptio Optimi Pessima (An pagka-raot kan tawong pinakamarahay sa gabos, iyo pinamaraot sa gabos.) Orog an satuyang kaogmahan asin pagpapasalamat sa Dios pag kita nakakaheling nin sarong tawong maraot na nagbabakle asin naghihingowa na mapakarahay an saiyang pagkabuhay asin minabalik sa Mahal na Dios. An pagbabagong buhay kan sarong tawong parakasala kaogmahan nin langit asin nakakapagtao nin paglaom sa satuya gabos na mga parakasala tanganing magpadagos sa satuyang paghingoa na magin marahay asin banal na tawo. An sabi ngani ni Cristo, “Yaon an kaogmahan sa atubang kan mga anghel kan Dios para sa sarong parakasala na nagbakle kan saiyang pagkabuhay.” (Lucas 15:10). Alagad dai man niato manenegaran na kamunduan asin pagkaherak an satuyang namamatean pag an sarong tawong marahay napapakaraot an saiyang buhay asin minalihis sa dalan nin katanosan. Nakakapanghinayang an siring na mga pangyayari. Minsan dai niato maiwasan maghapot, ano an nangyari saiya ta naraot an saiyang pagkabuhay? Paanong ang dating marahayon na studyante, ngonian adik na? Paanong ang dating marahay na abogado kato na parasurog kan mga kasaraditan, ngonian nagin kasabawat na kan mga maraot na pulitiko? Paanong an dating aktibo asin marahay na lider kan Simbahan ngonian imbwelto na sa mga crimen? Kasuogma lang marahay siyang tawo, alagad ngonian bako na. Nakakamundong isipon alagad ini sarong katotoohan na nangyayari sa satuyang pagkabuhay orog na sa buhay niato bilang mga Cristiano. Pano niato sasaboton an siring na “misterio” sa buhay niatong ini? An kasimbagan makukua niato sa evanghelio ngonian. Itinao satuya ni Cristo an parabola kan duwang magtugang na lalaki (Mateo 21:28-32) tanganing ipasabot satuya na an satuyang pagiging Cristiano sarong AROALDAW NA PANGAPODAN sa satuya sa pag-otob asin pagsabuhay kan saiyang kabotan. Kita inaalok AROALDAW kan satuyang Kagurangnan na “magtrabaho sa saiyang ubasan”, na maghingowa asin maglapigot na mabuhay sa kabanalan sa paagi kan pagiging maimbod sa pagsunod sa saiyang katukduan, sa pagibo nin mga karahayan, sa pagkamoot asin pagpapatawad. Asin sa satuyang pagsimbag, sa satuyang pagako, sa satuyang pag “iyo” sa saiyang pangapodan, kaipuhan bako lang sa tataramon kundi ini dapat maipaheling ta man sa satuyang mga gibo. An pangapodan kan Dios aroladaw, asin aroaldaw man kitang inaalok na magin maimbod sa pag-ako asin pag otob kan saiyang kabotan. Kaimbodan sa pag-ako asin pag-otob kan saiyang kabotan an kaipuhan niato tanganing sa satuyang pagsunod ki Cristo, makalikay kita na mawara sa dalan kan satuyang Kagurangan. Dai lang kita mina-“iyo” sa pagsimbag sa pangapodan kan Dios para sana maipahaling an satuyang paggalang saiya, alagad sa kauri urihi dai man niato ootobon siring sa ginibo kan panduwang aking lalaki sa parabola. O kaya minsan “nagiging ningas-kugon” sana kita. Sa enot lang kita marahay. Alagad sa paglipas kan panahon satuyang nililingawan asin binabayaan an satuyang obligasyun. Siring kita sa mga banhi na nahulog sa magapo asin madoot na mga daga, na kan mag abot na an mga tentacion kan kinaban, an mga problema asin kasakitan, nagadan man an mga balaog na inako niato sa Mahal na Dios, orog na balaog nin buhay asin kaligtasan. Giromdomon niato an sabi ni Cristo, “An siisay man na mawot na magsunod sakuya, sayumahan niya an saiyang sadiri, pasanon an saiyang krus AROALDAW asin magsunod sakuya” (Lucas 9:23). An pagsimbag asin pag-ako sa pangapodan kan Dios sa aroaldaw na pagkabuhay ipaheling sa tataramon asin sa gibo. An satuyang pagako asin pag otob kan tugon kan Mahal na Dios dai lang sa tataramon kundi orog sa gabos sa gibo. Dai lang kita minatao nin pag-omaw asin pagpapasalamat sa Kagurangnan sa paagi kan mga ritwal, pagdevocion asin manlaen-laen na celebracion kan mga Sacramento. Kaipuhan kakambal kan mga ini an mga gibong karahayan, arog kan pagtabang sa mga nagtitios, pagpakakan sa mga nagugutom. Pagbabago kan bilog na pagkabuhay tanda kan tunay na pagkamoot sa Dios. Totoo, kitang mga tao maluya asin parakasala. Pero bako ining dahilan tanganing magpundo o madisganar na kita sa pag-otob kan kabotan nin Dios. Tandaan niato na an Dios dai nagkukulang sa pagtao satuya nin grasya tanganing matabangan kitang magbakle kan satuyang mga maraot na buhay. Kaipuhan ta lang an makusog asin mapagpakumbabang pagtiwala saiya tanganing, sa tabang kan saiyang grasya, an satuyang puso asin isip madara sa pagsunod kan saiyang kabotan. Na siring sa enot na aking lalaki sa parabola, sa kauri urihi kan satuyang pagkabuhay, mahimo niato an saiyang tugon tanganing kita man magin maninigo na mag-erok sa saiyang Kahadean. — Rev. Fr. Emil D. Valeza Formator sa Holy Rosary Major Seminary I-download an Sambanwá para sa Domingong ini. Click here!

With the COVID19 pandemic, the Archdiocese of Caceres has cancelled all the major religious activities of the upcoming Peñafrancia celebrations this year. Several other activities and Union Bicol Clergy and the usual Diocesan Masses during the feast of INA are also cancelled. Such decision, though difficult, is the most practical to reduce our chances of being infected or spreading the virus. The Caceres Commission on Communications (CCCom) together with the Bicol Diocesan Social Communications Directors came up with a daily online program dubbed as “Sa Lindong kan Manto ni INA” a Peñafrancia Special from September 11 – 19, 2020 every 4:00 pm. The said 30-minute program features the Bicol Bishops' reflection on the teachings and examples of our INA with a purpose of leading the devotees to prayer and reflections on our present situation. The said program is aired daily at the Archdiocese of Caceres Facebook Page. The program hopes to draw all devotees around the world to pray to our Lord, the Divino Rostro, through the intercessions of Our Lady of Peñafrancia during this time of pandemic of COVID19. With the absence of the traditional religious activities, it is also an an alternative way of celebrating our devotion and lead to common discernment and reflection. And to express our oneness as a region as we pray together and hope to overcome the Pandemic through our love to INA and the Divino Rostro. Hosted by Fr. Joseph Wilfred V. Almoneda and Ms. Tess Bañares-Delfin, this preliminary program during the novenario also include lay faithful and priests who share their personal testimonies. Likewise, selected choirs also will be rendering Marian Songs, in a music video with pictures or videos of their Peñafrancia celebrations in the diocese. On September 19, 2020, the supposed Fluvial procession of INA, His Eminence, Luis Antonio Cardinal Tagle will share his message and reflections before the Pontifical Mass at 6:00 pm. Several Peñafrancia Associations abroad will also be featured during the final episode of the program. Indeed, during this time of pandemic, the social media is a great way for devotees to express their devotion to INA and unity as one children longing for healing and miracle in this trying times of COVID19.

Gikan sa Sambanwá Bicol Missalette, 13 September 2020 Saro si Nelson Mandela sa pinadakulang politico na nabuhay sa modernong panahon. Nakipaglaban siya tanganing magkaigwa nin pagkaoroyon asin pagkapantay-pantay sa oportunidad an gabos mga tawo, itom man o puting lahi, sa South Africa. Saro man ini sa dahilan nahaloy siya sa kulungan -- beinte siyeteng taon. Dai siya pigtogotan na makaantendir sa lobong kan saiyang ina asin aking lalaki. Kan siya nakaluwas na asin nangganang presidente kan South Africa, igwa na kuta siyang oportunidad na magbalos sa mga tawong nagpasakit sa saiya, alagad dai nya ini ginibo. Maogma niyang pinatawad an mga tawong nagin dahilan kan saiyang pagsakit. Sinasabing katumbas kan pagpapatawad an pangaran na Nelson Mandela. Saro sa mga pamana niya sa kinaban iyo an pagpaarog niya nin pagpapatawad bilang sarong istilo nin buhay. Pagpapatawad an tema kan satong mga babasahon ngonian na Domingo. Sa libro ni Sirak, ipinapagiromdom na dai kaongisan an kapwa asin patawadon sinda. Pinapatawad kita kun kita namimibi asin nagpapatawad. Daing saysay an pamibi kun dai kita tataong magpatawad. Dai kita maglaom na maoomayan nin helang sa kalag kun dai nagpapatawad. Sinasabi sa ikaduwang babasahon na para sa Dios kita. Alagad, dai kita maninigo sa saiya kun pano kita nin kaanggotan sa satong daghan. Dai kita magkondenar kan satong kapwa. Gabos kita parakasala na pinatawad sana kan Mahal na Dios. Mga parakasala kita alagad andam kita na akoon Niya, sa buhay man o sa kagadanan. Para sa mga Judiyo, hanggan tolo sanang beses sinda pwede magpatawad. Boot magpasikat si Pedro sa Kagurangnan. Saiyang pigdoble an tolo asin pigdagdagan nin saro kaya nagin pito. Pitumpolo may pito an sabi ni Jesus na dapat magpatawad an mga nagsusunod sa saiya. Boot sabihon kaini na dakul o mayong ontok an satong pagpapatawad sa satong mga kapwa na nagkasala sa satuya. Pano kita dapat na magpatawad? Sinasabing may tolong lakdang na maray na sunudon tanganing kita makapagpatawad. Enot, magmawot kita nin marahay sa satong kapwa na naggibo sato nin maraot. Normal sa satuya na kita magmawot nin maraot sa mga nagkasala sa satuya. Minamaldicion o isinusumpa ta sinda. Gusto ta sindang makarma o magbalik sa sainda an saindang maraot na ginibo sa sato. Alagad imbes na maldicion, maghagad kita nin bendicion para sa sainda. Maghagad kita sa Mahal na Dios na panoon sinda kaiba kan saindang mga pamilya kan mga biyaya kan Dios. Ikaduwa, makanood kitang lingawan an kulog na dara kan saindang ginobong maraot sa satuya. Pag may ginibo sa sato na maraot dificil ta na ining malingawan. Masabi kita na nagkakalakaga an satong dugo pag satong nahihiling an naggibo satong maraot o pag nagigiromdoman ta an saindang ginibong maraot. Nakukulugan pa kita. Dificil malingawan an nangyari o an ginibo. Alagad puwede tang lingawan an kulog kan pangyayari. Kan mga aki pa baga kita, tanda ta na pinakol kita kan satong mga magurang o mga maestro o maestra sa escuelahan. Pero, nalingaw na kita kan kulog kan pakapakol sa sato. “Forgive and forget the pain.” Dai ta malilingawan an nangyari. Alagad puwedeng malingwan an kulog. Asin, an ikatolo, iyo na magpangadie kita na kita magpatawad. Dificil and magpatawad. Kaya kaipuhan ta an tabang kan Mahal na Dios tanganing magibo ta ini. Sabi baga ni Alexander Pope, “to err is human; to forgive, divine.” Sa tabang kan Dios kita magpatawad. Darahon ta sa Dios an satong mga kulog boot asin mga hinanakit. Hagadon ta na tawan kita nin pagkamoot sa satong mga puso tanganing masalidahan kaini an satong pagkaongis. Arogon ta an Dios sa pagpatawad. Dai siya nagmawot nin maraot sa sato maski na kita maraot. Dai niya pigtatandaan an satong mga ginibong maraot. Giromdomon ta ngonian an mga tawong dipisil patawaron. Asin Magmawot kita nin mga marahay para sa mga nagkasala sa sato. Imbes na magsabi na maligis sinda nin truck o mahulugan nin tipong, hagadon ta na mapatos asin magbulos sainda an biyaya kan Dios. Magmawot kita ta na makakua sinda nin trabaho. Magmawot kita na magin maogma sinda kaiba kan saindang pamilya. Siring kaini an simple asin konkretong paagi nin pagpatawad. Puwedeng gibohon ini aroaldaw. Puwede man ining magin istilo kan satong Cristianong pagkabuhay. — Rev. Fr. Gerome N. Pelagio Secretario kan Arzobispo

From the Sambanwá Special English Missalette, 13 September 2020 In some Filipino movies, I always hear this typical conversation about forgiveness: Character 1: “Hinding hindi ko siya mapapatawad sa ginawa niya.” Character 2: “Patawarin mo na siya. Himihingi na siya ng tawad. Kung ang Diyos nga ay nagpapatawad, matuto ka rin magpatawad.” Character 1: “Hindi ko siya kayang patawarin sapagkat hindi ako Diyos!” My dear friends, it is really hard to forgive most especially if the wound is deep and sometimes we would think that only God could forgive without any boundaries, but in our Gospel today, Jesus is telling us to forgive also boundlessly. Why? It is because God has also forgiven us. As God has forgiven us, we, too must learn to forgive others. The problem with us is that we want to be forgiven. Perhaps all of us would demand for forgiveness and consideration when we have done something wrong, right? But we, ourselves, do not want to forgive. We demand for mercy but we do not give mercy. The beatitudes say: “Blessed are the merciful for they shall obtain mercy.” So, when we only demand for mercy for ourselves, what kind of attitude is that? Selfishness! When we say, “hindi ko siya mapapatawad sapagkat hindi naman ako DIyos”, we are becoming selfish human beings. We only want ourselves to be the recipient of peace and forgiveness. While it is true that God is rich in mercy and forgiveness, we must not also forget that we were created in the image and likeness of God. (Cf. Gen. 1:27) This means that when we forgive, we become reflections of God to others. When we forgive, we become true to our nature as human beings. In the Gospel today, we see the Master becoming indignant with the first servant because he cancelled out his debts and yet this servant became cruel with his fellow servant who has also some debts with him. Yes, my dear friends, the Master was mad at his selfishness. Siya ay pinatawad ngunit ayaw niyang magpatawad. My dear friends, God granted us and is continuously granting us forgiveness although we don’t deserve it. God is so generous and kind. The responsorial Psalm says: “The Lord is kind and merciful.” But sadly, most of us aren’t that grateful. How can we thank God’s kindness and mercy? – by giving that gift of forgiveness to others, too. Forgiveness requires time. Wounds take time to heal. And so, God does not require us to forgive immediately, what God looks at us is our effort and intention to reconcile. At least the first move counts. Why is it difficult to forgive? In the first reading, it says: “Wrath and anger are hateful things, yet the sinner hugs them tight.” (27:30) Who wants wrath and anger? Who wants to live all their lives with grudges and hate? Sino’ng gustong mamatay na punung-puno ng poot at galit? Perhaps all of us want to die peacefully but the problem with us at times is that we become comfortable with grudges to the point that we “hug” them as the first reading tells us. This calls us, therefore, to step out of our comfort zones. The world teaches us to nourish vengeance, grudges and hate; in fact, the world teaches us that it feels good to place “justice” in our hands; justice that is more often biased and irrational – “an eye for an eye, a tooth for a tooth.” This is our comfort zone. When we satisfy our vengeance, we make no difference with other animals. But we are not just animals, we are rational animals. Forgiveness makes us human although we may call the person who have offended us “inhuman”, forgiveness makes us different from them. Finally, forgiveness grants healing. In the first reading, we read: “Could anyone nourish anger against another and expect healing from the Lord?” (28:3) – Ah, healing comes with forgiveness. They are two sides of one coin. Who, then is healed? The one offended and the offender. First, the offended, they say that when hurt, forgiveness is the gift that you can offer to yourself. Healing will never start unless we initiate it. Then, second, the offender, - the offender, as long as he or she is contrite, would be healed. Conversion starts here. To forgive is not the same as to forget. A wound becomes a scar and it is there forever. Forgiveness is remembering. It is remembering that this person offended me once AND also remembering that God has given me many chances to change, to become better; and so, in gratitude, I am also extending that chance to change to this person who have offended me. — Rev. Fr. Jed Anthony F. Peña Formator and Principal, Holy Rosary Minor Seminary

Gikan sa Sambanwá Special Bicol Missalette, 11 September 2020 An celebrasyon kan Penafrancia ngonian na taon (2020), saro sa dai malilingawan na Fiesta sa buhay kan mga paratubod asin perigrinos. Mayo nin Traslacion asin Fluvial processions. Garo ipinapangalad si Ina. Dai itinotugot an paghadok sa saiya asin sa Divino Rostro. Garo labi kaharayo na dai kayang aboton kan satong mga kamot. Arog kan eksperiensya kan nagkapirang perigrinos na hale sa luwas kan probinsya, na pinapuruli, dai lamang nahiling an imahe huli sa padagos na pag-iingat sa peligro kaining pandemia. Sa nagkapirang veces nadadangog ko sa nagkapira: “Ano an nangyayari sa kinaban niato? Nuarin matatapos an pandemiang ini?” An buhay nin tawo asin an futuro kan kinaban garo mayong kasigurohan. Minsan an posibleng vaccine, na pighohona na iyo an mapaampat sa paglakop kan helang, pinagdododahan na bakong ‘safe’ na gamiton huli sa kakulangan ‘so boot’ nin tamang pag-aadal sa magiging side effects kaini sa mga tao. An kinaban nagkakabaranga. An mga tao, nag-iiriwal. Dakul an nawawaran nin trabaho. An pagtios lakop. An mga tao naghahanap nin kasimbagan. ‘Babae, uya an saimong Aki,’ dangan sinabihan an saiyang disipulo, ‘Uya an saimong Ina.’ (Jn 19:26-27) Sa mga tataramon na ini nin Kagurangnan, kita pinapagiromdom, magdolok kita sa Krus, duman makukua niato si Kristo, an Dios na ipinako asin nagadan huli sa satong mga kasalan. Kaiba Niya si Maria, na sagkod sa katapusan dai nanggad huminale sa kataed Niya. Ki Hesus, makukua niato an kasimbagan sa tabang kan paggiya ni Ina, Nuestra Snra de Penafrancia. Sa lalawgon kan satong Kagurangnan—an Divino Rostro, ipinapahiling sa satuya an realidad kan buhay nin tao sa kinaban, (lugar na pinili nin Dios na manitawo kaiba niato—kaya dai kita nagsosolo). Kinaban na pano nin pagtios asin nin pagsakit, an gabos na ini, natatala sa lawog kan satong Kagurangnan. Arin an dai naiisihan nin Dios sa mga pinag-aagihan niato sa buhay? Siisay an makakapagsabi na siya nagsosolo asin pinapabayaan? An gabos na ini tinios nin Kagurangnan nin may paglaom asin pagsarig sa kabotan nin Ama. Sabi Niya, ‘…Bako an kabotan ko, kundi an kabotan mo an kukuyogon.’ (Lk. 22:42) Mantang totoo na bakong madali an pag-ako asin pagsabot kan mga nangyayari satuya sa panahon na ini nin pandemia, an celebrasyon kaining Penafrancia magin lugod okasyon nin pagpararom kan satong pagtubod, pagsarig asin pagkamoot sa Mahal na Dios. Padagos kung ipinagpapasalamat sa Kagurangnan, an nagdadakul na parasimba asin paradalan kan livestream coverage kan misa sa Novenario kan Divino Rostro. Grasya ini nin Dios. Harayo kita sa kadasaro, alagad sararo, sa pag-omaw sa Saiya huli kan Santamisa. Mayo man nin Traslacion asin Fluvial processions ngonian na taon, alagad magbabaha nin pag-omaw asin pasalalamat sa Dios asin ki Inang Penafracia huli sa satong kapahaan na makukua sa SantaMisa na satong ididolot sa altar. Viva el Divino Rostro! Viva la Virgen! — Rev. Fr. Felipe B. Culvera, III Cura Parroco, Santuario asin Parroquia ni Nuestra Señora de Peñafrancia Ciudad nin Naga

Gikan sa Sambanwá Bicol Missalette, 06 September 2020 Igwang kasabihan sa Ingles: “God promised Christians a safe landing, not a smooth sailing”. Minsan sa pagbiyahe, igwa kitang kaipuhan na agihan na lubak lubak na tinampo. Alagad kaipuhan agihan niato ini tanganing makaabot kita sa satong destinasyon na matiwasay. An relasyon niato nakakabaing man sa sarong pagbaklay. Minsan makakasumpong kita nin tawo na nagtataong lubak-lubak sa satong dalan. Sinda garo mga turbulence sa biyahe kan eroplano. Mga kulog payo sa buhay niato asin nagigin dahilan kan kaangotan asin paglilibak. Sa madaling sabi nagigin kawsa man kan dagdag niatong pagkakasala. Siguro maisip kita kun pwede sana kita na an magkontrol kan saindang isip nganing mapatama an saindang pagtaram o kaya saindang mga hiro. An ebanghelyo niato ngonian na Domingo nagtatao nin linaw sa siring na problema. An enot – an pagpamibi. Siring sa sarong aki, an enot niatong pinagsusumbungan kan satong problema iyo an satong magurang. Kun igwa kitang problema sa kapwa, isumbong niato sinda sa pamibi. Imbes na i-tsismis, iusip niato an satong kaiwal o nakakulog sato sa pamibi. Sa siring na paagi, mapaghuhurop-huropan niato an satong gigibohon sa sunod na lakdang. Asin makakahagad kita nin kusog boot asin kalinawan nin isip sa satong sasabihon sa sunod. Nin huli an panduwa – an tamang urulay o fraternal correction. Dakul sa satong kinakaangotan dai man nagaaram kan saindang sala. Nin huli ta mayong nagtataram sainda, paghuna ninda tama an saindang ginigibo. Alagad kaipuhan kaini an deplomasya asin maray na kamawotan na makatabang. An tsismis o paglilibak, dai nungka makakatabang. Kun kaipuhan nin testigo o katuwang mas maninigong gibohon. An pantolo iyo solusyon na dapat magdara sa matiwasay na relasyon. An pagpatawad (reconciliation) asin pagbalik sa dating maray na relasyon (restoration). Dakul na tawo nagsasabi, “pinatawad ko na yan”, pero pagnagkasabatan sa tinampo, dai man giraray nagtitinohan. Siguro kaipuhan nin panahon nin pag-omay tanganing mapag-adalan an pag-omay kan lugad kan kasalan. Minsan masakit mangyari an tunay na pakikipagulian. Dai niato kayang kontrolon an isip asin boot kan satong kapwa. Alagad an satong sadiri pwede niato makontrol asin magpasensya. Asin pwede ining magtao sato nin adal asin leksyon. Totoo, kaipuhan niatong magpangadie asin magpakumbaba. Padagos kitang magbabaklay sa manlaen-laen na dalan kan satong bakong perpektong relasyon. An importante, igwa kitang “safe landing” - makaabot kita gabos kaiba an satong namomotan – pati na an satong kinakaangotan - duman sa satong destinasyon, sa buhay na daing kasagkoran. — Rev. Fr. Luisito A. Occiano Direktor, Caceres Commission on Communications Cura Parroco, Parroquia kan San Bartolome, Apostol Baao, Camarines Sur I-download an Sambanwá para sa Domingong ini. Click here!

Gikan sa Sambanwá Bicol Missalette, 30 Agosto 2020 Mayo ni siisay man sa sato an mawot magsakit sa kinaban na ini! Mayo ni siisay man sa sato an mawot nin mga problemang papasanon! Mayo ni siisay man sa sato an mawot magkaigwa nin kulog-payo sa satong relasyon! Mayo ni siisay man sa sato an mawot na mabuhay sa mayong kasagkuran na Byernes Santo! Sa enot na babasahon, makalihis na ibalangibog an Tataramon kan Dios, nag-abot sa punto na si Jeremias nagreklamo sa Dios nin huli ta sya pinag-ngingisihan asin pinag-ulog-ulog kan mga tawo. Sya napurisaw na gayo asin dai na matagalan an pagsakit na saiyang namatean. Sa Ebanghelyo ngonyan, tulos-tulos na sinagwe ni Pedro an Kagurangnan makalihis na ipahayag Nya an Saiyang nagdadangadang na pagsakit asin pagkagadan sa Jerusalem. “Iparayo lugod ini saimo, Kagurangnan! Dai ini mangyayari saimo sagkod pa man!” Dai maako ni Pedro na an Maestro na nag-apod saiya na magin parasira nin katawohan, an Kagurangnan na pinagkatiwalaan sya kan susi nin Kahadean kan Dios, masapo nin kasakitan asin kagadanan. Alagad, imbes na omawon sya kan Kagurangnan, sinagwe sya asin sinabihan: “Duman ka sa likod, Satanas! Inuulang mo ako; an saimong iniisip bakong sa Dios, kundi sa tawo.” An mga tataramon na ini garo minapasabot sato na mina-uyon si Jesus sa ano man na klase nin pagsakit. Alagad, pag-abot sa huring kabtang kan Ebanghelyo, nagtao si Jesus sato nin duwang rason kun tano ta an krus, simbolo nin pagsakit, kaipuhan na pasanon kan siisay man na nagmamawot na magsunod Saiya. Enot, “An siisay man na buot sumunod sako, kaipuhan lingawan nya an sadiri nyang buhay, magpasan kan saiyang krus asin magsunod sako." Katakod kan desisyon sa magsunod ki Kristo iyo an riyalidad kan kasakitan. An pagsakit digdi bakong bunga kan sadiring gibo kundi nin huli kan "persona" na pinili nyatong sunudon. Kaya, haputon ta an satong mga sadiri: "Tano ta sa Kristyanong pagsunod kinakaipuhan an pagsakit?" An simbag: Nin huli ta an mga prinsipyo kan satong Kagurangnan minakontra sa mga gawe kan kinaban. Minasabi an kinaban ngonyan na kun an dalagan kan sarong relasyon dai magaya-gaya, tapuson na tulos asin bayaan! Alagad, mina-insistir an Kagurangnan kan pagkamuot na dai makasadiri asin kan mayong sagkod na pagpapatawad. Asin kun susunudon ta an mga katukduan kan satong Kagurangnan, siring ki Propeta Jeremias sa enot na babasahon, pag-ngingisihan kita asin ipag-uulog-ulog! Nin huli kaini, dai nyato maiiwasan an pagsakit sa satong kamawotan na magsunod ki Kristo. Ikaduwa, "Huli ta an Aki nin Tawo, kaiba an saiyang mga angel, madigdi sa kamurawayan nin saiyang Ama, asin an lambang saro saiyang babalsan sa sukol kan naginibo nin lambang saro.” An mga tataramon na ini ni Jesus nagpapasabot sato na an pagsakit maagi sana, siring sa Saiya na, matapos pasakitan asin gadanon sa krus, nabuhay giraray sa mga gadan. Igwang kasagkuran an pagsakit nin huli ta an pagkamuot kan Dios mayong kasaguran asin minaliwanag dawa na sa kadikluman kan kagadanan. Ini an agyat sa sato ngonyan na Dominggo --- na padagos kita na magin mga tagaharubay kan Tataramon nin Dios, arog ni Jeremias, sa paagi kan padagos na pagpasan kan satong mga krus tanganing arog man ki Pablo, sa ikaduwang babasahon ngonyan, mai-atang man nyato an satong mga hawak "siring sa buhay na atang, banal asin maninigong akoon nin Dios!" Kun padagos kitang kinakaungisan kan mga tawo nin huli sa satong pagigin maimbod sa mga prinsipyo nin satong Kagurangnan, dai kita maghadit nin huli ta an buot sabihon kaini nasa tamang dalan kita pasiring ki Kristo. Magdanay kita sa tahaw nin mga pagsakit, urog na sa panahon na ini na kita nasa pandemya, nin huli ta sa puro kan dalan na ini mapapangyari an panuga ni Jesus sa sato na Sya magigin kaibahan ta sagkod sa katapusan. Mga tugang, padagos pa man giraray dawa ngonyan na mga panahon an pagpersigir kan mga Kristyano sa bilog na kinaban nin huli sa desisyon na magsunod ki Jesus. Aram nyato na igwang mga pagkakataon na garo masuko na kita asin mareklamo na sa Dios nin huli sa masakit na kondisyon na ini. Alagad, nagtutubod kita na gabos ini matatapos sana nin huli ta kita minasarig sa sarong paglaom --- paglaom na bakong ideya o prinsipyo, alagad sarong persona, totoong tawo, totoong Dios, an satong Kagurangnan Jesukristo! Amen! — Rev. Fr. Xavier R. Amoroso Director, Commission on Liturgical Music Formator, Holy Rosary Major Seminary Concepcion Pequeña, Ciudad nin Naga I-download an Sambanwá para sa Domingong ini. Click here!

Gikan sa Sambanwá Bicol Missalette, 23 Agosto 2020 Para ki Jesus, siisay ako? Ano an masasabi ni Jesus dapit sako ngonian? Sa atubang nin Kagurangnan, ano an sakong kamugtakan? “Ngonian sinasabihan taka: Ika Gapo, asin sa ibabaw kan gapong ini papatindogon ko an sakong Simbahan.” Ini an personal na pagkamidbid ni Jesus ki San Pedro. Ini bunga kan mga taon na sinda nag-ibahan sa pagpamibi, sa pagrokyaw kan Evangelio asin pagtabang sa mga nangangaipo. Ining sinabi ni Jesus sarong biyaya na gikan sa pagkamaheherakon asin pagkamarahayon kan Dios bako sa mga kasalan ni kaluyahan ni mga karahayan ni San Pedro. “Magrayo ka sako Kagurangnan saro akong parakasala!” “Kagurangnan aram mo an gabos.” Bako akong maninigo na apodon na masasarigan na “Gapo” nin huli ta ako kulang ngani sa pagsarig, kulapos sa pagtubod na ika na Dios kaipuhan na magtios asin magadan sa cruz. Bako akong “Gapo” nin huli ta pignegaran taka sa tahaw nin makuri mong pagtios. Alagad an Kagurangnan nagtaram: “Paladan ka, Simon, aki ni Jonas…Ngonian sinasabihan taka: ika Gapo!” Siring kan pagkamidbid ni Jesus ki San Pedro, an pagkamidbid nin Dios sa lambang saro sa sato gikan sa satong personal na namumugtakan. Para sa Kagurangnan, siisay ka sa tahaw kaining nagpapadagos na pandemya? Ika daw gapong matagas na daing pakiaram, daing pakilabot sa pagsunod kan mga patakaran kan gobyerno lokal o nasyonal? O gapong masasarigan kan kadaklan? Ika daw igwa nin mga kamot na kurakot o kuripot? O mga kamot na daing ontok sa pag-omaw sa Dios asin mahigos sa pagtabang sa mga nagtitios? Siisay ka para ki Jesus? Frontliner: doctor o nurse o trabahador sa hospital? Padi sa parokya o madre sa kumbento daing patod sa pag-arang sa Dios? Pasyente kan COVID o na-aatendir kan pasyente sa quarantine facility? Siisay man o yaon saen man kita, sa hospital, sa tinampo, sa tindahan, sa Mall, sa harong, sa simbahan o sa escuelahan man ining hapot ni Jesus dai niato madudulagan. Siisay ako para sa Kagurangnan? Bakong madaling simbagon ining kahapotan. Bako ining True or False o Multiple Choice sa exam. Dai ini masisimbag sa sarong semester na distance learning o online learning. Dai puedeng i-google an tamang kasimbagan. Minsan pa i-search sa Wikipedia, ini matataranta. An pagkamidbid sa Dios personal. Ini sarong commitment, o tipan habang kita nabubuhay. Siring sa sarong relasyon, an pagkamidbid sa Dios halawig na proseso na gikan bako sa mga libro o sinasabi sato kan ibang mga tawo kundi sa mga experiencia nyato sa buhay lalung-lalo sa mga panahon nin kasakitan asin kadificilan. Si Job namidbiran an Dios na tunay na marahayon asin maheherakon sa tahaw nin helang asin pagkawara kan saiyang mga iniposan asin mahal sa buhay. An mga Israelita mas lalong nasabotan asin namatean an pangataman asin pagmangno kan Dios na Kaglalang kan sinda nasa lantad nin cuarentang taon. Bako daw ining extended community quarantine sarong paagi nin Dios tanganing mas lalo pa nyato siyang mamidbiran? Asin sa satong pagkamidbid sa saiya mas mapapararom pa niato an pagkamidbid ta sa satong mga sadiri? “Ika an Cristo, an Aki nin Dios na buhay!” olay ni San Pedro. Ining kapahayagan nin pagtubod pinanindogan ni San Pedro sagkod sa kagadanan. Siisay ako, para ki Cristo? Kun masisimbag ta ining kahapotan masisimbag ta man nin personal an hapot nin Kagurangnan: “Siisay ako sa paghona nindo?” “Siisay ako para saimo?” Midbid na nin Kagurangnan an saiyang sadiri. Alagad dai pa nyato siya midbid nin husto. Dai niya kaipo an mga “likes” o pusoan ta siya sa social media. Mas interesado siya kan mismong puso tang bukas sa pagkanood asin pagkasabot asin pusong maimbod sa pagsunod kan kabotan nin Dios. Dai kaipo nin Kagurangnan an mga “followers” sa social media para magin popular sana. Kaipo ni Jesus nin mga “followers” na siring ki San Pedro handa na makanood asin magsunod sa dalan nin cruz sa aroaldaw na pagkabuhay. Sa tahaw nin makuring kasakitan, kahandalan, katikapuhan, siisay sa sato an igwa pa kan siring na pagtubod na makapagrokyaw nin makusog: “Ika an Cristo, an Aki nin Dios na buhay!”? — Rev. Fr. Joey D. Gonzaga Rector, Holy Rosary Major Seminary Concepcion Pequeña, Ciudad nin Naga Giya sa Paghorop-horop para sa mga SKK Kasuarin ko daw namatean na ako tunay na kabtang kan Simbahan asin nahiling ko an kagayonan kan buhay na idinodolot kan comunidad na ini? Siring ki Pedro na pinaniwalaan ni Jesus kan katongdan bilang lider kan comunidad, ako man pinaniwalaan kan Kagurangnan kan katongdan bilang sarong binonyagan. Naootob ko daw an sakong mga katongdan bilang miembro kan Simbahan? Ano an mga dahelan kan sakong dai pag-otob kaiyan? I-download an Sambanwá para sa Domingong ini. Click here!

NAGA CITY – The Naga Parochial School opened its 73rd academic year on Monday, 20 July 2020, utilizing both online and modular instruction under the school’s Flexible Learning Experience or NPS FLEX. Heeding the invitation of Jesus In a live broadcast marking the start of the school year on Monday, Rev. Fr. Dario I. Echipare, School Director, expounded on the school’s motto, “let the little children come to Me” (Mk 10:14), saying that in response to such call, the school stands as an avenue where every child is given importance in the pursuit of their integral development." Addressing the students, he encouraged them to excel and take pride in achievement, while maintaining respect and appreciation for the hard work and sacrifices of their families, teachers, and classmates. He also challenged them to be productive despite the pandemic, exhorting them to “make every opportunity an avenue for growth. Grow up to be responsible citizens. Success cannot be measured by material achievement alone. Your contribution to the world and society matters more than what you get out of it.” In the same broadcast, Fr. Echipare expressed his gratitude to the students’ parents and guardians for entrusting their children to the school. He assured them that their children are in good hands, and that the faculty and staff of the Naga Parochial School are one with them in ensuring that their children will be equipped to face the challenges of the 21st century, and become one of the best members of the society. A deep sense of communion Coinciding with his 74th Birthday, Caceres Archbishop Rolando J. Tria Tirona, OCD, DD presided over the Mass of the Holy Spirit at the Naga Metropolitan Cathedral on 22 July 2020. The said Mass is an annual tradition which invokes the aid of the Holy Spirit as the school formally marks the start of the academic year. In his homily, the Archbishop explained that in invoking the Holy Spirit, the Naga Parochial School is not only a school for itself, but it also shows a deep sense of communion with other schools by embracing and partnering with them. The Prelate added that “true education must lead us not to isolation, but to communion. If we do not grow in our sense of communion with others then we have failed with our task as educators.” The Archbishop also expounded on the importance of the parents, especially as their children attend to their classes from home. According to the Prelate, “unless parents participate, the education of the students will not be complete. The Holy Spirit, my dear parents, is there to help you, our students, and our teachers work together in a participative manner." Archbishop Tria Tirona also visited the School on Thursday, 23 July. During his visit, he took time to meet the students via video conference. CCCom News/JC Madrid

Gikan sa Sambanwá Bicol Missalette, 16 Agosto 2020 Sa Evangelio niato ngonian, nadangog niato an istorya kan babaeng taga Canaan na igwa nin tolong rason na mayo siyang derecho na maghagad nin pabor ki Hesus. Enot siya sarong babae, para sa mga Judeo an babae hababa sa kumunidad. Dai pinagtatawan nin halaga. Panduwa, siya sarong taga Canaan pigkokonsiderang sinda mga kaiwal kan mga Israelita asin pangtolo siya sarong pagano. Para sa mga Judeo, an mga pagano mayong lugar sa sociodad nin huli ta maati an saindang rasa. Kun sa kawat na baseball, an babae sa Evangelio, struck out na sa karawat. Mayo na siyang paglaom na makukua an saiyang hinahagad. Igwang kasabihan si Winston Churchill “Success is stumbling from failure to failure wiith no loss of enthusiasm.” An kapangganahan iyo an pagbangon sa paulit ulit na kadaogan na kun saen dai nawawara an sigasig asin kamawotan sa buhay. Totoo an babae sa Evangelio igwa nin tolong kakundian o kaulangan. Alagad igwa man siyang tolong mahahalagang bagay na kaipuhan nin sarong nagmamawot nin kasimbagan sa saiyang kahagadan. Enot an babae igwa nin tunay na pagkamoot. Bilang ina, an saiyang pagkamoot sa saiyang aki mayong pakakaulang. Totoo saro siyang pagano, alagad maski ngani siya siring, an saiyang pagkamoot dakulaon na maray. An pagkamoot niya nakakaagid sa pagkamoot nin Dios na gigibohon an gabos mailigtas sana kita. Sa siring na pagkamoot, natanyog si Cristo. Panduwa, siya babaeng igwang pagtubod. Inapod niya si Jesus na Aki ni David. Saro ining titulong pampolitika alagad pano nin kahulugan asin respeto. Digdi minapoon an pagtubod niato, na mamidbidan niato si Cristo asin igalang niato siya sa satong pagkabuhay aroaldaw. Asin an pantulo, siya pursigido. Dai nagsusuko tolos. Sa saiyang pagpamibi maski tolong beses siyang sinayumahan, paulit ulit man giraray siyang nakemaherak. Siya sarong modelo nin pag-pamibi asin kapakumbababaa. Para saiya, an pamibi bakong ritual kundi sarong kamawotan na makarani sa Dios, asin kamawotan na masimbag an saiyang pag-arang ki Hesus. Dakul kitang mga kahagadan sa buhay. Ngonian na mga aldaw, afuera sa pakimaherak saiya na tabangan kita sa satong inaagihan na pandemia, dakul pa kitang mga personal na pangangaipo. Kun sa enot nakasentro kita sa pagkatawo kan babae, alagad katapus-tuposi kaini, mahihiling niato an daing sagkod na pagkamoot ni Cristo sato gabos. Mayo siyang pinipiling rasa or relihiyon. Siya an Dios na magpapaumay sa gabos. Dai sana kita magluya kundi padagos na magsarig asin magtubod sa saiyang kapangyarihan asin pag-ampon. — Rev. Fr. Luisito A. Occiano Direktor, Caceres Commission on Communications Cura Parroco, Parroquia kan San Bartolome, Apostol Baao, Camarines Sur Giya sa Paghorop-horop para sa mga SKK Anong pagyayari sa buhay ko na nagluya an sakong pagtubod sa Kagurangnan? Ano an mga tanda na ako nakamate nin danay na pagkamoot asin pag-ampon ni Hesus I-download an Sambanwá para sa Domingong ini. Click here!